திருக்குறள்: ஆராய்ச்சிப் பதிப்பு

எத்தனையோ மொழிகளில் மொழிபெயர்க்கப்பட்டிருக்கிறது திருக்குறள். எத்தனையோ பேர் இதற்கு உரையும் எழுதியிருக்கிறார்கள். அவர்களில் முக்கியமானவரான பரிமேலழகரின் உரையை அடிப்படையாகக் கொண்டு, மணக்குடவர், பரிதியார், காளிங்கர், கவிராஜ பண்டிதர், பரிப்பெருமாள் போன்ற உரையாசிரியர்களை ஒப்புநோக்கி ஆய்வுசெய்து பதிப்பிக்கப்பட்ட நூல் ‘திருக்குறள்: ஆய்வுப் பதிப்பு’. சிறந்த தமிழறிஞரான கி.வா. ஜகந்நாதன் தொகுத்து எழுதிய நூல் இது.

1950-ல் தி.சு. அவினாசிலிங்கம் தலைமையில் அன்றைய குடியரசுத் தலைவர் டாக்டர் ராஜேந்திர பிரசாதால் திருக்குறள் ஆராய்ச்சிப் பணி தொடங்கப்பட்டது. கி.வா.ஜ.-வின் கடும் முயற்சியால் ஆய்வு நிறைவுற்று, ராமகிருஷ்ணன் மிஷன் வித்யாலயம் வெளியீடாக 1963-ல் இந்நூல் வெளியிடப்பட்டது. 956 பக்கங்களுக்கு விரியும் இந்தப் பிரம்மாண்ட புத்தகம் 2004-ல் மறுபதிப்பு செய்யப்பட்டது. திருக்குறளை முழுமையாக உள்வாங்க விரும்புபவர்களுக்கு இந்த நூல் ஒரு பொக்கிஷம்!