புதிய பாதை புதிய தலைமை

தலைமை என்பது பதவியோ புகழோ அல்ல - மனிதர்களின் வாழ்க்கையைத் தொட்டு மாற்றும் ஆற்றல். அந்த ஆற்றல் அதிகார அரங்குகளில் அல்ல; எளிய சூழலில், எளிய மனிதர்களின் கைகளில் பிறக்கிறது.

ஒரு சுய உதவிக் குழுவில் பெண்களைத் தன்னம்பிக்கையுடன் முன்னேற்றிய வழிகாட்டி, ஒரு கிராமப் பள்ளியை உயிர்ப்பித்த தலைமையாசிரியர், ஒரு மருத்துவமனையை மாற்றியமைத்த இளம் மருத்துவர் - இவர்கள்தாம் உண்மையான தலைவர்கள். இவர்களின் சாதனைகள் பெருமை பேசும் மேடைகளில் அல்ல; அன்றாட வாழ்க்கையின் அமைதியான அரங்குகளில் ஒலிக்கின்றன. இவர்களின் செயல்கள் ஓசையற்ற இசைபோல நம் சமூகத்தின் நரம்புகளில் ஆழம் புகுந்து பரவுகின்றன.

நூலாசிரியர் க. பழனித்துரை இந்த நூலில், ‘மாற்றம் பெற்ற ஒருவரே மாற்றங்களை நிகழ்த்த முடியும்’ என்ற சிந்தனையை வலியுறுத்துகிறார். தன்னிலே மாற்றத்தைத் தொடங்கி, சமூகத்துடன் கரிசனமாய் இணையும்போது தலைமை மலர்கிறது என்பதைக் கள அனுபவங்களின் நம்பிக்கையோடு சித்திரிக்கிறார்.

‘புதிய பாதை புதிய தலைமை’ வெறும் கோட்பாட்டு நூலல்ல; அது நடைமுறை அனுபவங்களின் வெளிப்பாடு. கிராமங்களின் அடித்தளத்தில் உழைக்கும் மக்களின் குரலாகவும், புதிய தலைமுறைக்குத் திசைகாட்டியாகவும் இது திகழ்கிறது. சமூக மேம்பாட்டைக் கனவாகக் கொண்டவர்களுக்கும், தங்கள் வாழ்க்கையில் அர்த்தமுள்ள மாற்றத்தை நாடுபவர்களுக்கும் இந்த நூல் ஓர் அவசியமான துணை.